அய்யா இன்னும் என்னை பாராட்ட வேண்டும்,வாழ்த்த வேண்டும்!-மு.க.ஸ்டாலின்

ஈ.வெ.ரா.பெரியார் 51-வது நினைவு நாள் இன்று மாநிலம் முழுவதும் அனுசரிக்கப்பட்டு வரும் நிலையில், அரசியல் கட்சித் தலைவர்கள் பெரியார் சிலைக்கு மாலை அணிவித்து மரியாதை செலுத்தி வருகின்றனர். அந்த வகையில் தமிழ்நாடு முதலமைச்சர் மு.க.ஸ்டாலின் சென்னை அண்ணா சாலையில் உள்ள பெரியாரின் திருவுருவச் சிலைக்கு கீழ் அமைக்கப்பட்ட பெரியார் புகைப்படத்திற்கு மலர் தூவி மரியாதை செலுத்தினார்.இதைத்தொடர்ந்து பெரியார் திடலில் அமைக்கப்பட்டுள்ள பெரியார் பகுத்தறிவு எணினி என்ற டிஜிட்டல் நூலகம் மற்றும் ஆய்வு மய்யத்தை திறந்து வைத்தார். அப்போது தமிழ்நாடு முதலமைச்சர் மு.க.ஸ்டாலினுக்கு பெரியார் கைத்தடி மாதிரியை திராவிட கழக தலைவர் கி.வீரமணி நினைவு பரிசாக வழங்கினார்.

இதை அடுத்து முதலமைச்சர் மு.க.ஸ்டாலின் ஆற்றிய உரை முழு விபரம்:

என்ன பேசுவது என்று புரியாமல் நான் விழித்துக் கொண்டிருக்கிறேன். காரணம் நம்முடைய அய்யா ஆசிரியர் அவர்கள் எனக்கு அளித்திருக்கக்கூடிய அந்த பரிசை வாங்குகின்றபோது என்னையே நான் மறந்திருக்கிறேன். வாழ்க்கையில் எத்தனையோ பேர் பரிசுகளை நாம் பெற்றிருக்கலாம், வழங்கப்பட்டிருக்கலாம். ஆனால், இந்தப் பரிசுக்கு எதுவும் ஈடாகாது என்பதை நான் உணர்ந்து கொண்டிருக்கிறேன். போதும், எனக்கு இது போதும். திராவிட மாடல் என்றால் என்ன என்று கேலி செய்து கொண்டிருப்பவர்களுக்கு இந்த கைத்தடி ஒன்றே போதும். தாய் வீட்டிற்கு வந்திருக்கிறேன். தாய் வீட்டிற்கு வருகிறபோதெல்லாம் நான் உணர்ச்சியை, எழுச்சியை தொடர்ந்து பெறுவதுண்டு. ஆகவே, அதை பெற்று நான் இன்றைக்கு உங்கள் முன்னால் நின்று கொண்டிருக்கிறேன்.

ஆண்டாண்டு காலமாக ஒடுக்கப்பட்ட தமிழினம் ஒற்றுமை பெறவும், சுயமரியாதை உணர்வு பெற்று மேலெழுந்து நிற்கவும், தன்னுடைய வாழ்நாள் முழுவதும் பாடுபட்டு, பல்வேறு தியாகங்களைப் புரிந்து நம்முடைய இனத்திற்காக அயராது உழைத்திருக்கக்கூடிய நம்முடைய ஈரோட்டுச் சிங்கம் பகுத்தறிவுப் பகலவன் தந்தை பெரியார் அவர்களுடைய மறைந்த இந்த நாளில், அவருடைய கருத்துகளை, அவருடைய எண்ணங்களை, அவருடைய போராட்டங்களை, அவருடைய தியாகங்களை, அவருடைய வாழ்க்கை வரலாற்றை நம்முடைய இளைய தலைமுறையினருக்கு எடுத்துச் சொல்லக் கூடிய வகையில் “டிஜிட்டல் நூலகமாக, ஆய்வு மையமாக” இன்றைக்கு திறந்து வைக்கப்பட்டிருக்கிறது!

தந்தை பெரியார் அவர்கள் தனது பயணத்தை முடித்துக் கொண்டார். நாம் தொடர்வோம் என்று தலைவர் கலைஞர் அவர்கள் சொன்னாரே! தந்தை பெரியாரின் தொண்டர்களான நாம் அந்தப் பயணத்தைத் தொடங்கி, இந்த முன்னெடுப்பை செய்திருக்கிறோம்! அவர் வாழ்ந்த காலத்தில், அவர் பேசிய முற்போக்குக் கருத்துகளுக்காக, மானுட சமுதாயத்தின் விடுதலைக்கான கருத்துகளுக்காக பழமைவாதிகளிடமும், பிற்போக்குவாதிகளிடமும் கடுமையான எதிர்ப்பை அவர் சந்தித்தார்.

ஊருக்குள் வரக்கூடிய தடை; பேசத் தடை; கோயிலுக்குள் நுழைய தடை; எழுதத் தடை; பத்திரிகை நடத்தத் தடை; போராட்டம் நடத்தத் தடை. அத்தனை தடைகளையும் உடைத்து, அவர் நம்மை வீதிகளில் மட்டும் நுழையவிடவில்லை. இந்த மண்ணுலகில் வாழக்கூடிய அத்தனை பேரின் மனங்களிலும் அவர் நுழைந்திருக்கிறார் அதுதான் தந்தை பெரியார் அவர்கள்! அதனால்தான், தந்தை பெரியார் அவர்கள் மறைந்து 50 ஆண்டுகள் ஆன பிறகும், இன்றைக்கு அவரைப் பற்றி பேசிக் கொண்டிருக்கிறோம், அவரைப் பற்றி புகழ்ந்து கொண்டிருக்கிறோம், அவருடைய வரலாற்றைச் சொல்லிக் கொண்டிருக்கிறோம். அவரை இன்றைக்கு நினைவுபடுத்தி அந்த உணர்வுகளை நாம் வெளிப்படுத்திக் கொண்டிருக்கிறோம். இதுதான் தந்தை பெரியாரின் தனித்தன்மை!

தந்தை பெரியாரின் கருத்துகளை இன்றைக்கு வரைக்கும் எல்லா மக்களிடம் கொண்டு சேர்த்து, என்றென்றும் பெரியார் வாழ்கிறார் என்ற நிலையை உருவாக்கியிருக்கிறார் நம்முடைய பெருமதிப்பிற்குரிய அய்யா ஆசிரியர் அவர்கள்! பெரியார் தொடங்கிய இயக்கத்தை பெரியாரின் கொள்கைகளை இந்த திராவிடப் பேரியக்கத்தை காத்து வருபவர்தான் நம்முடைய ஆசிரியர் அய்யா அவர்கள். இந்த 90 வயதிலும், அய்யா ஆசிரியர் அவர்கள் சுற்றி சுற்றி வரக்கூடிய இந்தப் பயணத்தை எல்லாம் பார்க்கின்றபோது, நமக்கே ஆச்சரியமாக இருக்கிறது.

ஆனால் ஆச்சரியப்படும் அளவிற்கு சொன்னாலும், அதை தந்தை பெரியாரிடம் அவர் கற்றிருக்கக்கூடிய அந்த பாடத்தைத் தான் இன்றைக்கு அவர் வெளிப்படுத்திக் கொண்டிருக்கிறார். இன்னும் பல்லாண்டு காலம் நீங்கள் வாழ்ந்து, எங்களைப் போன்ற இளைஞர்களுக்கு இன்னும் நீங்கள் ஊக்கத்தைத் தந்திடவேண்டும் என்று திராவிட முன்னேற்றக் கழகத் தலைவராக, தமிழ்நாட்டின் முதலமைச்சராக, அய்யா பெரியாரின் தொண்டராக நான் உங்களிடத்தில் கேட்டுக் கொள்கிறேன். பெரியாரின் தொண்டராக நான் வாழ்த்துகிறேன்; வாழ்த்துகிறேன்; வாழ்த்துகிறேன்.

“பெரியாரின் மண்டைச் சுரப்பை உலகு தொழும்” என்று புரட்சிக் கவிஞர் பாரதிதாசன் பாடினார். இன்றைக்கு தந்தை பெரியாரை உலகமயமாக்கி உலகத்தின் பொதுச் சொத்தாக கொண்டு சேர்த்திருக்கிறோம். இந்த நூலகத்தை சிறப்புற உருவாக்கித் தந்திருக்கக்கூடிய ஆசிரியர் அவர்களுக்கும், தம்பி அன்புராஜ் அவர்களுக்கும் நான் இந்த நேரத்தில் வாழ்த்துகளையும், பாராட்டுக்களையும் தெரிவித்துக் கொள்கிறேன்.

நினைத்துப் பார்க்கிறேன்… அய்யா வருகிறபோது சொன்னார்.. 1974-ஆம் ஆண்டு நம்முடைய முத்தமிழறிஞர் முதலமைச்சராக இருந்தபோது, இதே திடலிற்கு வந்து, பெரியார் பகுத்தறிவு நூலகம் மற்றும் ஆய்வு மையத்தை அன்றைக்கு திறந்து வைத்திருக்கிறார். அதற்கு பெரியார் திடல் உருவாக்கப்பட்டிருந்த இந்த டிஜிட்டல் நூலகம் எல்லா வகைகளிலும், பயன்படக்கூடிய வகையில் இன்றைக்கு அவருடைய மகனாக இருக்கக்கூடிய ஸ்டாலின்  முதலமைச்சராக வந்து இன்றைக்கு இந்த ஆய்வு மையத்தை நான் தொடங்கி வைத்திருக்கிறேன். எப்போதும் பயனுள்ள பணிகளை பார்த்து, பார்த்து செய்யக்கூடியவர் நம்முடைய ஆசிரியர் அவர்கள். எனவே, திராவிடக் கழகத் தோழர்களையும், இதற்கு உறுதுணையாக இருக்கின்ற உங்கள் அத்தனை பேர்களையும் இந்த நேரத்தில் நான் மனதார வாழ்த்துகிறேன்; பாராட்டுகிறேன்.

நம்முடைய பகுத்தறிவுப் பகலவன் தந்தை பெரியார் அவர்களுக்கு எனது இனமான வணக்கத்தை இந்த நேரத்தில் செலுத்துகிறேன். அய்யா குறிப்பிட்டுச் சொன்னார், அண்மையில், கேரளா மாநிலத்தில் இருக்கக்கூடிய வைக்கம் போராட்டத்தை நினைவுபடுத்தி, வைக்கம் வீரராக வலம் வந்த தந்தை பெரியாருக்கு அங்கு புதிய மாளிகையும், கம்பீரமான சிலையையும், இளைய சமுதாயத்தினருக்கு பயன்படக்கூடிய வகையில் ஒரு பெரிய நூலகமும், திறந்து வைக்கப்பட்டு வைக்கம் விழாவினை சிறப்பாக நடத்தினோம். அப்போது நான் உணர்ந்தது என்னவென்று கேட்டால், அய்யா ஆசிரியர் அவர்கள் அப்படியே மெய்மறந்து அந்த நிகழ்ச்சிக்கு வந்தார். வந்தது மட்டுமல்ல, என்னை மனதார பாராட்டினார். வாழ்த்தினார். இன்னும் என்னை பாராட்ட வேண்டும், வாழ்த்த வேண்டும் அதற்காக நான் காத்திருக்கிறேன். காத்திருக்கிறேன் என்பதை மாத்திரம் இந்த நேரத்தில் சொல்லி, அய்யா புகழ் வாழ்க! வாழ்க! வாழ்க! என்று தெரிவித்து என் உரையை நிறைவு செய்கிறேன்.