பத்ம விருதுகள் 2025 அறிவிப்பு: பட்டியலில் தமிழகத்தைச் சேர்ந்தோர் 15 பேர்கள்!

நம் நாட்டில் உயரிய விருதுகளில் ஒன்றாகக் கருதப்படும் பத்ம விருதுகள், ஆண்டுதோறும் குடியரசுத் தினத்தையொட்டி மத்திய அரசால் அறிவிக்கப்படும். அவை, பத்ம விபூஷண், பத்ம பூஷண் மற்றும் பத்மஸ்ரீ ஆகிய மூன்று பிரிவுகளில் வழங்கப்படுகின்றன. கலை, சமூகப் பணி, பொது விவகாரங்கள், அறிவியல் மற்றும் பொறியியல், வர்த்தகம் மற்றும் தொழில், மருத்துவம், இலக்கியம் மற்றும் கல்வி, விளையாட்டு, குடிமைப்பணி போன்ற பல்வேறு பிரிவுகள் மற்றும் துறைகளில் சிறப்பாக பணியாற்றுவோருக்கு பத்ம விருதுகள் வழங்கப்படுகின்றன.சிறப்பான சேவைக்காக 'பத்ம பூஷண்' விருதும், எந்தவொரு துறையிலும் சிறப்பான சேவைக்கு 'பத்மஸ்ரீ' விருதும் வழங்கப்படுகிறது. ஒவ்வொரு ஆண்டும் குடியரசு தினத்தன்று இந்த விருதுகள் அறிவிக்கப்படுகின்றன. இந்த விருதுகள் ஒவ்வொரு ஆண்டும் வழக்கமாக மார்ச் / ஏப்ரல் மாதங்களில் குடியரசுத் தலைவர் மாளிகையில் நடைபெறும் விழாவில் குடியரசுத் தலைவரால் வழங்கப்படுகின்றன.

அந்த வகையில், இந்த ஆண்டுக்கான பட்டியலை மத்திய அரசு வெளியிட்டது.7 பேருக்கு பத்ம விபூஷண், 19 பேருக்கு பத்ம பூஷண் மற்றும் 113 பேருக்கு பத்ம ஸ்ரீ என மொத்தம் 139 பேருக்கு பத்ம விருதுகள் அறிவிக்கப்பட்டன. இந்த விருது பட்டியலில் 23 பேர் பெண்கள். வெளிநாட்டினர், வெளிநாடு வாழ் இந்தியர் 10 பேர், இறப்பிற்கு பிறகு 13 பேர் விருது பெறுகிறார்கள். அதாவது, தெலங்கானாவை சேர்ந்த துவ்வுர் நாகேஷ்வர ரெட்டி (மருத்துவம்), சண்டிகர் நீதிபதி (ஓய்வு) ஜெகதிஷ் சிங் கேஹர், குஜராத்தின் குமுதினி ரஜினிகாந்த் லகியா, கர்நாடகாவின் லட்சுமிநாராயண சுப்ரமணியம், கேரளாவின் எம்.டி. வாசுதேவன் நாயர் (மறைவு), சுசுகி மோட்டார் நிறுவனத்தின் முன்னாள் சிஇஓ மறைந்த ஓசாமு சுசுகி, பிஹாரின் ஷார்தா சின்ஹா (மறைவு) ஆகிய 7 பேருக்கு பத்ம விபூஷண் விருதுகள் அறிவிக்கப்பட்டுள்ளன.

இதுபோல, தமிழகத்தை சேர்ந்த தொழிலதிபர் நல்லி குப்புசாமி, நடிகர் அஜித்குமார், நடிகை ஷோபனா சந்திரகுமார், ஆந்திராவை சேர்ந்த நடிகர் நந்தமூரி பாலகிருஷ்ணா, பிஹார் முன்னாள் துணை முதல்வர் மறைந்த சுஷில் குமார் மோடி உள்ளிட்ட 19 பேருக்கு பத்ம பூஷண் விருதுகள் அறிவிக்கப்பட்டுள்ளன.

தமிழகத்தை சேர்ந்த குருவாயூர் துரை.கே.தாமோதரன், லட்சுமிபதி ராமசுப்பையர் (தினமலர்), எம்.டி.ஸ்ரீநிவாஸ், புரிசை கண்ணப்பா சம்பந்தன், ஆர்.ஜி.சந்திரமோகன், கிரிக்கெட் வீரர் ஆர்.அஸ்வின், ராதாகிருஷ்ணன் தேவசேனாபதி, சீனி விஸ்வநாதன், பறை இசைக் கலைஞர் வேலு ஆசான் ஆகிய 10 பேர் உட்பட 113 பேருக்கு பத்மஸ்ரீ விருதுகள் அறிவிக்கப்பட்டுள்ளன. பத்ம விருதுகள் பட்டியலில் 23 பெண்கள், 10 வெளிநாட்டினர் இடம்பெற்றுள்ளனர்.

புதுச்சேரியை சேர்ந்த தவில் கலைஞர் பி.தட்சிணாமூர்த்தி, அமெரிக்க மென்பொறியாளர் சேதுராமன் பஞ்சநாதன், ஹரியானாவை சேர்ந்த பாரா வில்வித்தை வீரர் ஹர்விந்தர் சிங் (33), கோவாவில் சுதந்திரப் போராட்டத்தில் முக்கிய பங்கு வகித்த லிபியா லோபோ சர்தேசாய் (100), டெல்லியை சேர்ந்த மகப்பேறு மருத்துவர் நீரஜா பாட்டியா, மேற்கு வங்கத்தைச் சேர்ந்த தக் இசைக் கலைஞர் கோகுல் சந்திரதாஸ் (57), நாகாலாந்தை சேர்ந்த பழ விவசாயி எல்.ஹாங்திங் உள்ளிட்டோருக்கு பத்மஸ்ரீ விருது அறிவிக்கப்பட்டுள்ளது.

இதுபோல பிரேசிலை சேர்ந்த இந்து ஆன்மிக தலைவர் ஜோனஸ் மசெட்டி, குவைத்தை சேர்ந்த ஷீகா ஷேகா அலி அல் ஜபர் அல்-சபாவும் இந்த பட்டியலில் இடம்பிடித்துள்ளனர். உத்தரா கண்டை சேர்ந்தவர்களும் இந்தியாவின் பாரம்பரியம் பற்றி எழுதி புகழ்பெற்றவர்களுமான மறைந்த ஹக் மற்றும் கொலீன் கான்ட்சர் தம்பதிக்கும் பத்மஸ்ரீ விருது அறிவிக்கப்பட்டுள்ளது.

பத்ம விருதுகள் அறிவிக்கப்பட்டுள்ளவர்களுக்கு பிரதமர் மோடி வாழ்த்து தெரிவித்துள்ளார்.முதல்வர் ஸ்டாலினும் தமிழகத்தில் இருந்து பத்ம விருதுகள் பெற தேர்வாகியுள்ள தொழில் துறையை சேர்ந்த நல்லி குப்புசாமி, கலை துறை சேர்ந்த அஜித்குமார், விளையாட்டு துறையை சேர்ந்த அஸ்வின் உட்பட அனைவருக்கும் தனது பாராட்டினை தெரிவித்துள்ளார். இது தொடர்பாக சமூக வலைதளத்தில் முதல்வர் ஸ்டாலின் பகிர்ந்துள்ள பதிவில் “பத்மா பூஷண் விருதுக்குத் தேர்வாகியுள்ள நடிகர் அஜித்குமார், நல்லி குப்புசாமி, ஷோபனா சந்திரகுமார் ஆகிய மூவருக்கும்; பத்மஸ்ரீ விருதுக்குத் தேர்வாகியிருக்கும் அஸ்வின், குருவாயூர் துரை, தாமோதரன், லக்‌ஷ்மிபதி ராமசுப்பையர், எ.டி.ஸ்ரீனிவாஸ், புரிசை கண்ணப்ப சம்பந்தன், ஆர்.ஜி.சந்திரமோகன், ராதாகிருஷ்ணன் தேவசேனாபதி, சீனி விஸ்வநாதன், வேலு ஆசான் ஆகியோருக்கும் எனது நெஞ்சார்ந்த பாராட்டுகளை உரித்தாக்கிக் கொள்கிறேன். தத்தமது துறைகளில் தாங்கள் மென்மேலும் உயரங்களை அடைய வேண்டும், தமிழ்நாட்டுக்குப் பெருமை சேர்க்க வேண்டும் என வாழ்த்துகிறேன்” என கூறியுள்ளார்.

பத்ம விருதுக்கு தேர்வு செய்யப்பட்டிருப்பது பெருமை அளிக்கிறது என்று நடிகர் அஜித் தெரிவித்துள்ளார். இதுகுறித்து நேற்று அவர் வெளியிட்ட அறிக்கையில் ‘ குடியரசு தலைவரால் மதிப்பிற்குரிய பத்மபூஷண் விருது பெறுவதில் நான் மிகவும் பெருமை அடைகிறேன். அவருக்கும், பிரதமருக்கும் எனது மனமார்ந்த நன்றி.

மற்றபடி எனது குடும்பத்தினருக்கும், நண்பர்களுக்கும், ரசிகர்களுக்கும், திரைத்துறையினருக்கும் எனது நன்றி. உங்கள் அன்பும், ஆதரவும் எனக்கு அதிக பலமாக இருக்கிறது. மறைந்த என் தந்தை என்னை வாழ்த்துவார் என்றும், இதற்காக அவர் பெருமைப்படுவார் என்றும் நம்புகிறேன். என் மனைவி ஷாலினி, மகள் அனோஷ்கா, மகன் ஆத்விக் ஆகியோருக்கும் நன்றி. நேர்மையுடனும், ஆர்வத்துடனும் தொடர்ந்து சேவை செய்ய நான் கடமைப்பட்டுள்ளேன்’ என்று தெரிவித்துள்ளார்.